Psa 118 | NdeIBE | STEP | Mbongeni uJehova ngokuba ulungile; uthando lwakhe lumi laphakade.

Psalms 118

1 Mbongeni uJehova ngokuba ulungile; uthando lwakhe lumi laphakade.

2 U-Israyeli katsho athi: “Uthando lwakhe lumi laphakade.”

3 Kayithi indlu ka-Aroni: “Uthando lwakhe lumi laphakade.”

4 Akuthi bonke abamesabayo uJehova bathi: “Uthando lwakhe lumi laphakade.”

5 Ngathi ngidabukile ngakhala kuJehova, waphendula ngokungikhulula.

6 UJehova ulami, angiyikwesaba. Umuntu angenzani kimi na?

7 UJehova ulami; ungumsizi wami. Ngizazinyonkoloza ngegunya izitha zami.

8 Kungcono ukuphephela kuJehova kulokuthemba umuntu.

9 Kungcono ukuphephela kuJehova kulokuthemba amakhosana.

10 Zonke izizwe zangihanqa, kodwa ngegama likaJehova ngazichitha.

11 Zangihanqa inxa zonke kodwa ngegama likaJehova ngazichitha.

12 Zangiminyezela njengezinyosi kodwa zafa masinyane njengokungunguma komlilo wameva; ngebizo likaJehova ngazichitha.

13 Ngasunduzelwa emuva ngaphose ngawa, kodwa uJehova wangisiza.

14 UJehova ungamandla ami lengoma yami; yena useyikusindiswa kwami.

15 Imisindo yentokozo lokunqoba iphuma emathenteni abalungileyo: “Isandla sokunene sikaJehova senzile izinto ezinkulu!

16 Isandla sokunene sikaJehova siphakanyisiwe kakhulu; isandla sokunene sikaJehova senzile izinto ezinkulu!”

17 Angizukufa kodwa ngizaphila, ngizamemezela lokho akwenzileyo uJehova.

18 UJehova ungitshayile kakhulu, kodwa kanginikelanga ekufeni.

19 Ngivulela amasango okulunga; ngizangena ngimbonge uJehova.

20 Nanti isango likaJehova okungangena khona abalungileyo.

21 Ngizakubonga, ngokuba ungiphendule; usuyinsindiso yami.

22 Ilitshe abalilahlileyo abakhi seliyilona litshe lesisekelo;

23 uJehova ukwenzile lokhu; njalo kuyamangalisa emehlweni ethu.

24 Leli lilanga alenzileyo uJehova; kasithokoze sijabule ngalo.

25 O Jehova, sisindise; O Jehova, siphumelelise.

26 Ubusisiwe lowo ozayo ngegama likaJehova. Siyakubusisa sisendlini kaJehova.

27 UJehova unguNkulunkulu, wenzile ukukhanya kwakhe kwehlela phezu kwethu. Liphethe izingatshana, ngenani edibini lomgido lize liyofika ezimpondweni zealithare.

28 UnguNkulunkulu wami, ngizakubonga: unguNkulunkulu wami, ngizakuphakamisa.

29 Mbongeni uJehova ngokuba ulungile; uthando lwakhe lumi kuze kube phakade.